Aga, Charlene, hindi nagpakasal sa US

"Aga wants to get married once, ‘yun ang pangarap niya!" react ni Ms. Ethel Ramos tungkol sa issue na nagpakasal sina Aga at Charlene sa US nang magkita ang dalawa last month.

‘Yun umano ang rason kaya sinundan ni Charlene si Aga nang umalis ang huli para mag-concert sa US - para magpa-SM as in magpa-secret marriage.

"Magkaiba sila ng lakad. Si Aga nag-concert, si Charlene naman nag-renew ng green card."

By the way, gagawa ng pelikula sina Aga at Charlene. Hindi na kasi matutuloy ang pagpapa-sexy ni Charlene na ang unang project sana ay kasama si Richard Gomez.

Maraming excited sa gagawin sanang pagpapa-sexy ng dating beauty queen. Pero hindi ibig sabihin nito ay pinagbabawalan siya ni Aga.

Dahil noon pa man ay nagsabi na si Morning na hindi niya idi-discourage si Charlene na iwan ang showbiz kahit mag-asawa na sila. Choice ng actress na ‘wag nang ituloy ang planong pagbi-bare sa pelikula.

Pero bago ang pelikula nila ni Charlene, mas mauunang gawin ng actor ang movie uli nila ni Regine Velasquez. Wala pang title pero hindi ito sequel ng first movie nilang May Nag-iisang Ikaw. Malamang na si Joyce Bernal uli ang maging director nila.

Anyway, naunang dumating sa bansa si Charlene last Tuesday. Samantalang Wednesday night dumating ang grupo ni Aga dahil twice na-delay ang flight nila. Mahigit isang buwan ding nawala ang aktor.

Apat na show ang ginawa ni Aga with the Side A Band sa US at Canada. Sa Taj Mahal, Atlantic City ang unang stop over nila - (October 14) and then, tumuloy sila sa San Francisco (October 21), Los Angeles (October 28) at last stop nila ang Calgary, Canada kung saan nag-concert si Aga last November 3. Grabe raw ang response ng mga kababayan nating naka-base na sa mga nabanggit na lugar ayon sa kuwento ni Tita Ethel na kasama sa whole trip. At talaga raw nag-sing and dance si Aga kaya enjoy ang mga naho-homesick nating kababayan. Full packed lahat ng concert venue at unahan ang mga kababayan nating manood kahit medyo mahal ang ticket.

Mas inspired daw mag-perform si Aga sa LA and Calgary dahil nasa audience si Charlene with her mom, Elvie Gonzales.

Aside from tita Ethel, kasama rin ni Aga sa nasabing trip ang mother niyang si Anita at brother na si Alex. Si tita Elvie at Richard Bonnin naman ang kasama ni Charlene.

Nakilala na rin ni Aga ang bestfriend ng wife -to-be niya - si Reyza Roxas na classmate ni Charlene sa college. Pero hindi niya (Reyza) inabutan ang concert ni Aga sa LA kaya sumunod ito sa Calgary. Si Reyza ang magiging maid of honor nina Aga at Charlene sa kanilang wedding next year. Classmate ni Charlene si Reyza sa Mary Mount College sa States. Aside from Reyza wala pang sinasabi sina Charlene at Aga kung sinu-sino ang magiging part ng entourage ng kasal nila.

Anyway, pagdating nila ng Calgary, ipinasyal sila ng mother ni Smokey Manaloto, Mrs. Gia Manaloto na naka-base na ngayon doon. "Yung isang sister ni Smokey ang nagdala sa mother nila roon," tita Ethel says. Asikasong-asikaso raw sila.

At isa sa memorable place na napuntahan ng grupo nila Aga ay ang Our Lady of Grace sa Philadelphia kung saan kinunan ang ilang eksena sa Sixth Sense starring Bruce Willis.

Hindi ito ang unang pagkakataon na nag-concert si Aga sa abroad with the Side A Band.

May nag-offer na noon pa kay Aga na gumawa ng album. Pero hindi tinanggap ng actor, hanggang concert lang daw muna siya.

* * *

Nanood si Robin Padilla with Claudine Barretto ng concert nina Jeffrey Osborne and Peabo Bryson with Regine Velasquez called Celebration of Love last Saturday night sa Araneta Coliseum.

Si Jeffrey ang composer and artist ng "On The Wings of Love" na ni-revive ni Regine sa kanyang R2K Album.

But before the concert last Saturday ay nagbigay ng dinner si Boss Vic del Rosario kina Jeffrey, Peabo and Regine. And guess kung ano ang ginawa ni Regine sa dinner - ipinakilala niyang si Jeffrey Osborne si Peabo Bryson. Mismong si Peabo ang nagkuwento ng nasabing insidente sa actual concert. Actually, special participation lang si Regine sa nasabing concert.

Kasabay ng Celebration of Love ang Abuse Me Concert ni Aiai delas Alas sa Folk Arts Theater. Pero ayon sa isang nakapanood, hindi napuno ang FAT. Hindi rin daw dumating si Mark Anthony Fernandez na nauna nang na-press release na makikipag-dirty dancing kay Aiai.