MANILA, Philippines — Patay ang isang construction worker na tumulong lang sa kanyang kaibigan sa pagbebenta ng cellphone nang barilin ng sinasabing buyer sa Calamba, City, Laguna, bago maghatinggabi ng Lunes.
Kinilala ng pulisya ang nasawi na si alyas “Ronnie”, nasa hustong gulang, at residente ng ng Barangay Kay-Anlog, Calamba City, Laguna habang isinailalim na sa dragnet operation ng Calamba City Police ang suspek na si alyas “Mark”, binata, at residente ng Barangay Sirang Lupa, Calamba City.
Saksi naman sa insidente ang kaibigan ng biktima na si Mark Christian Punongbayan, 27-anyos, isa ring construction worker at residente ng Barangay Kay-Anlog, Calamba City.
Sa ulat, alas-11:20 ng gabi ng Enero 20 nang maganap ang in-sidente sa kalye Majada-in Housing sa Barangay Canlubang, Calamba.
Sa imbestigasyon, ikinuwento ni Punongbayan na nakontak niya ang buyer ng kanyang cellphone na si alyas Mark para sa ibinebenta nitong cellphone, at iniabot niya sa kaibigang si Ronnie upang dalhin nila sa napagkasunduang lugar.
Gayunman, nang makaharap ng dalawang obrero ang suspek ay ipinakita umano ng biktima ang cellphone pero bigla na siyang pinaputukan ng baril na kanyang ikinabulagta.
Dito agad itinawag ang insidente sa Nuvali outpost na rumesponde sa lugar subalit nakatakas na umano ang suspek sakay ng Yamaha Mio habang nadatnan pa nila na duguang nakahandusay ang biktima sa tabi ng isang kulay pulang Honda Wave na may plakang 5578 WQ.