CATANAUAN, Quezon, Philippines — Hindi na umabot pang buhay sa ospital ang isang motorcycle rider matapos nitong mabangga ang isang kalabaw na namatay rin sa Barangay Macpac ng bayang ito kamakalawa ng gabi.
Ayon sa ulat ng pulisya, alas-6:30 ng gabi, minamaneho ni alyas “Kenneth”, 24, ang kanyang motorsiklo sa kahabaan ng highway nang biglang tumawid ang isang anim na buwang gulang na kalabaw na agad nitong nabangga.
Nagtamo ng matinding pinsala sa ulo ang rider kung kaya isinugod sa hospital subalit idineklarang dead-on-arrival ng sumuring doktor.
Ayon sa pulisya, kinatay naman ng may-ari ang kalabaw matapos na mamatay sa aksidente.