Dalaga, 1 pa dedo sa aksidente sa Bulacan

MALOLOS CITY, Bulacan, Philippines — Patay ang 25-anyos na dalagang tumawid sa kalsada matapos aksidenteng masagasaan ng trailer truck sa lungsod ng Meycauayan.

Kinilala ang nasawing biktima na si Rhenielyn, accounting staff at residente ng Brgy. Mojon, Malolos City, Bulacan.

Sa report ng pulisya, naganap ang insidente bandang 8:45 ng gabi nitong January 16, sa Mc Arthur Highway sakop ng Brgy. Saluysoy sa Meycauayan.

Sa inisyal na imbestigasyon at base na rin sa salaysay ng saksi, nag-aalangang tumawid ang biktima subalit tumuloy pa rin siya hanggang sa aksidenteng masagasaan ng truck na paluwas.

Agad na dumating ang rescue team sa lugar subalit idineklarang no signs of life ang biktimang nagkalasug-lasog nang pumailalim sa truck

Nahaharap naman ang driver na nagngangalang Alvin, 33, residente ng Cabatuan, Isabela sa kaukulang kaso habang nasa kostudiya ng pulisya.

Samantala, bandang 4:30 ng madaling araw nitong Enero 17, sa Mc. Arthur Highway, Brgy. Wakas, patay rin ang isang “Narciso”, 26, residente ng Brgy. Mojon, Malolos nang aksidenteng makasalpukan ang Isuzu dump truck na minamaneho ni alyas “Rico”, 48, residente ng Brgy. Siling Matanda, Pandi, Bulacan na nahaharap sa kaukulang kaso habang nasa kostudiya ng pulisya.