Babae, pinagbabaril sa likod-bahay, patay

MANILA, Philippines — Isang babae ang patay nang pagbabarilin ng mga ‘di kilalang salarin sa kanilang likod-bahay sa Brgy. Burgos, Rodriguez, Rizal, kamakalawa ng gabi.

Ang biktima ay kinilala lang na si alyas ‘Sha,’ 44, at residente ng Dela Costa Subd., Brgy. Burgos, Rodriguez.

Inaalam pa naman ng mga otoridad ang pagkakakilanlan ng salarin na mabilis na nakatakas matapos ang krimen.

Batay sa ulat ng Rodriguez Municipal Police Station, dakong alas- 9:00 ng gabi nang maganap ang krimen sa likurang bahagi ng bahay ng biktima.

Sa salaysay ng mga kaanak ng biktima, nabatid na kasalukuyan silang kumakain ng hapunan nang magtungo ang biktima sa likod bahay.

Maya-maya ay nakarinig na lamang umano sila ng mga putok ng baril at nang alamin ang pinagmulan nito ay nagulat nang makitang duguan nang nakahandusay ang biktima.

Mabilis namang isinugod sa H-Vill Hospital ang biktima ngunit idineklara na ring dead-on-arrival ng mga doktor.