COTABATO CITY, Philippines — Dalawang barangay kagawad na nakabase sa Zamboanga del Sur ang magkasunod na tumimbuwang matapos na parehong tambangan at pagbabarilin ng mga armadong kalalakihan nitong Biyernes ng gabi at Sabado ng hapon sa nasabing lalawigan.
Ayon kay Brig. Gen. Bowenn Joey Masauding, director ng Police Regional Office-9, sakay ng kanyang motorsiklo ang biktimang si Joemar Requilme, kagawad ng Barangay Lantawan, San Miguel, Zamboanga del Sur, nang tambangan ng mga lalaking armado ng mga pistols sa isang liblib na bahagi
ng highway sa Barangay Poblacion, San Miguel, Zamboanga del Sur na nagresulta sa kanyang agarang pagkamatay.
Mabilis na nakatakas ang mga pumatay kay Requilme, gamit ang kanilang mga get-away motorcycle.
Nauna rito, napatay rin sa pananambang si Michael Virallo nitong Biyernes ng gabi sa Barangay Upper Dumalinao sa Dumalinao, Zamboanga del Sur.
Si Virallo, isang aktibong kagawad ng Barangay Upper Dumalinao ay naglalakad mag-isa sa Sitio Mangga sa naturang barangay nang lapitan ng mga armadong
lalaki at pinagbabaril ng mga pistols at nang kanilang mapatay ay agad na tumakas.
Nagtamo ng 12 na tama ng bala sa ulo at katawan si Virallo, ayon sa ulat ng Dumalinao Municipal Police.