Sunog sa Bagong Taon sumiklab: Lalaki tepok, 26 bahay at simbahan tupok
MANILA, Philippines — Malungkot na Bagong Taon ang sinapit ng ilang pamilya matapos na matupok ang kanilang tahanan nang sumiklab ang malaking sunog na ikinasawi ng isang lalaki at puminsala sa may P37.5 milyong halaga ng mga ari-arian nitong Miyerkukes ng gabi sa kahabaan ng Kennon Road, Tuba, Benguet.
Ang nasawing biktima ay nakilalang si Eric Dili Pacio, taga-Brgy. Mayag Bauko, Tadian, Mountain Province.
Sa ulat ng Office of Civil Defense (OCD) Cordillera at ng Police Regional Office (PRO), dakong alas-5:30 ng umaga nang magsimula ang sunog sa Camp 4, Kennon Road, Tuba ng lalawigang ito.
Ang sunog ay mabilis na kumalat na tumupok sa 26 kabahayan na pinaninirahan ng nasa 36 pamilya sa lugar.
Bukod sa mga kabahayan, napinsala rin ng sunog ang pook sambahan ng Iglesia ni Cristo (INC) sa lugar.
Idineklara naman ng mga nagrespondeng bumbero na kontrolado na ang sunog bandang alas-7 ng umaga.
Sa isinagawang clearing operations ng mga bumbero at iba pang rescue team ay narekober ang bangkay ng isang lalaki na na-trap sa sunog.
Ipinag-utos naman ni Baguio City Mayor Benjamin Magalong ang pansamantalang pagpapasara sa Kennon Road bunga ng insidente habang patuloy ang imbestigasyon sa insidente.
- Latest
