Magulang kritikal…
MANILA, Philippines — Isang 6-anyos na batang babae ang nasawi habang sugatan naman ang kanyang mga magulang matapos na salpukin ng Sports Utility Vehicle (SUV) ang kanilang motorsiklo Miyerkules ng madaling araw sa Southern Cebu.
Dead on arrival sa Vicente Sotto Memorial Medical Center si Caroline Delute, habang kritikal naman ang kaniyang
mga magulang na sina Deidre Delute, 26, at asawa nitong si Jennifer, pawang residente ng Brgy. Pardo, Cebu City
Sa report ng pulisya, pasado alas-2:00 ng madaling araw nang maganap ang aksidente sa national highway sa Brgy. Langtad, Naga City.
Sakay ng motorsiklo ang mga biktima at pa-punta sana sa bayan ng San Fernando para mamasko nang salpukin ng SUV na minamaneho ni alias Wise Knight, 21, residente ng Simala, Sibonga.
Dinala sa Vicente Sotto Memorial Medical Center ang mga biktima,subalit idineklarang dead on arrival si Caroline.
Inihahanda na ang kasong reckless imprudence resulting in homicide, physical injuries, and damage to property laban sa driver ng SUV na nakapiit sa Naga City Police Station.
Humingi naman ng tawad ang driver ng SUV at inaming nakatulog siya dahil kalilibing lamang ng kaniyang ina dalawang araw bago ang Araw ng Pasko.