Lola natusok leeg ng basag na windshield, patay!

LEGAZPI CITY, Albay, Philippines — Hindi na umabot pang buhay sa pagamutan ang isang 62-anyos na lola matapos tumama at tumusok sa kanyang leeg ang malaking bubog ng nabasag na salamin o windshield ng tricycle makaraang umangat at bumagsak ang steel plate na nakatakip sa butas ng kalsada nang daanan ng dump truck na pag-aari ng 2nd Engineering District office ng Department of Public Works and Highways-Sorsogon sa by-pass road ng Brgy. Gogon, Legazpi City, Albay kamakalawa ng hapon.

Sinubukan pang isugod sa Legazpi City Hospital ang duguang lola, residente ng Brgy. Bogtong pero dahil sa maselang lagay nito ay inilipat sa Bicol Regional Hospital and Medical Center pero idineklarang dead-on-arrival.

Sa ulat, pasado ala-1 ng hapon binabagtas ng tricycle na sakay ang biktima kasama ang isa pang 50-anyos na babaeng pasahero ang kahabaan ng by-pass road.

Kasalubong ng tricycle na bumabagtas sa naturang kalye ang dump truck na pag-aari ng DPWH-Sorsogon at minamaneho ni Noel Mallorca nang aksidenteng madaanan ng truck na kargado ng buhangin ang steel plate na nakalatag at nakatakip sa butas ng kalsada dahilan para umangat ito saka bu­magsak sa windshield ng tricycle.

Sa lakas ng impact ay nabasag ang salamin at tumalsik ang matulis na bubog sa leeg ng biktima na sanhi ng kanyang kamatayan.