Sinasakyang motor, tumba sa overtake...Contractor dedo sa dump truck, 11-anyos sugatan

BUENAVISTA, Quezon, Philippines — Patay agad ang isang contractor nang matumba ang minamaneho nitong motorsiklo at masagasaan ng trak habang nasugatan ang angkas niyang lala­king minor kamakalawa ng gabi sa Barangay Bukal ng bayang ito. 

Ang biktima na nagtamo ng grabeng pinsala sa ulo at iba’t ibang parte ng katawan ay kinilalang si “ Melvin “, 44, may asawa, planting contractor at residente sa nasabing lugar habang ginagamot sa San Narciso District Hospital dahil sa mga sugat sa katawan ang 11-anyos niyang angkas na si alyas “Raven”.

Ayon sa pulisya, minamaneho ng biktima ang isang Suzuki raider motorcycle angkas ang nasabing bata at binabagtas nang maganap ang insidente sa kahabaan ng national road dakong alas-6:55 ng gabi. 

Tinangka umanong mag-overtake ng motorsiklo ng mga biktima sa Howo dump truck na minamaneho ni alyas “Joey” ng Naga City suba­lit natumba ito na naging sanhi upang masagasaan ng unahang gulong ng trak. 

Nasa kustodya na ng Buenavista Police ang driver ng trak at patuloy na iniimbestigahan.