MANILA, Philippines — Isang sundalo ang nasugatan matapos atakihin ng mga hinihinalang miyembro ng New People’s Army (NPA) ang tropa ng relief mission team ng pamahalaan sa Pio Duran, Albay nitong Linggo.
Agad kinondena ni Philippine Army Spokesman Col. Louie Dema-ala ang insidente na iginiit na hindi man lamang isinaalang -alang ng mga umatakeng rebelde ang relief mission na kailangang maihatid ang ayuda sa mga nasalantang indibidwal sa kanilang komunidad.
Sinabi ni Dema-ala na kasalukuyang abala ang tropa ng Army’s 49th Infantry Battalion (IB) sa pamamahagi ng mga kinakailangang relief supplies sa mga naapektuhang pamilya sa Brgy. Matanglad, Pio Duran ng lalawigan nang mangyari ang insidente.
Bigla na lamang umanong umatake ang mga rebelde na pinasabog ang landmine saka pinaulanan ng bala ang mga sundalo na nauwi sa maikling putukan bago nagsitakas ang mga kalaban.
Ang nasabing sundalo ay mabilis namang isinugod sa pagamutan para malapatan ng pangunahing lunas.