CAVITE, Philippines — Patay ang isang lalaki matapos barilin sa mukha ng kanyang bayaw dahil sa tangkang pag-awat nito sa away mag-asawa, kamakalawa sa Brgy. Kanluran Rosario Cavite.
Wasak ang mukha sanhi ng tama ng bala ang biktima na si Christoper Trinidad Baquiran, nasa hustong gulang at residente ng nasabing lugar, na agad nitong ikinamatay.
Tinutugis nang pulisya ang tumakas na suspek na nakilala lang sa alyas “Jose”, mister ng kapatid na babae ni Baquiran.
Sa imbestigasyon ng mga awtoridad, alas-10:00 ng umaga nang maganap ang insidente. Nagtatalo umano ang suspek at asawa nito na kapatid ng biktima nang umawat ang huli.
Gayunman, sa tindi ng galit ng suspek, pinagbalingan nito ang umaawat na bayaw at binaril nang malapitan sa mukha.
Duguang humandusay ang biktima habang mabilis na tumakas ang suspek sakay ng Yamaha Mio motorcycle na kulay asul tangay ang baril na ginamit sa pagpatay.