CAVITE, Philippines — Ratsada sa huling araw ng paghahain ng certificate of candidacy (COC) ang mga politikong tatakbo sa 2025 election sa lalawigang ito..
Kabilang dito ang tambalang Remulla-Revilla na naghain ng kanilang COC sa pagka-gobernador at bese-gobernador, ayon sa pagkakasunod, sa lalawigan ng Cavite.
Si Abeng Remulla, bunsong anak ni Secretary of Justice Boying Remulla ang tatakbong gobernador habang ang bunsong anak ni Senator Bong Revilla na si Ram Revilla ang bise gobernador nito, na parehong batam-bata at unang sabak sa pulitika.
Sa ikatlong distrito, si AJ Advincula , anak ni Imus Mayor Alex Advincula ang tatakbo sa pagkongresista kung saan makakatunggali nito si Emmanuel Manny Maliksi, dating mayor ng Imus City.
Sa Imus, muling naghain ng kaniyang kandidatura si City Mayor “AA” Advincula para sa kaniyang ikalawang termino na posibleng walang makalaban sa halalan.
Dagsa rin sa huling filing ng COC sa Comelec sa lungsod ng Trece Martires at Imus ang mga konsehal, Board member at iba pang mga kongresista ng lalawigan, gayundin ang mga konsehal ng bawat lungsod at bayan.