3 ‘drug den operators’ sa Cotabato timbog ng PDEA

COTABATO CITY, Philippines —Tatlong hinihinalang drug den operators na konektado umano sa isang terrorist group ang nalambat ng Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM) sa Barangay Poblacion 2, dito sa lungsod nitong Lunes.

Kinilala ang mga suspek na sina Abdul Eman Kusin, Norman Pendular, Richard Hilaga Batuga.

Ayon sa pulisya, maliban sa operasyon ng mga suspek sa kanilang drug den sa Barangay Poblacion 2, nagbebenta rin umano ang tatlo ng shabu sa mga liblib na lugar sa Central Mindanao na may presensya ng Dawlah Islamiya.

 Sa ulat nitong Martes ni Gil Cesario Castro, director ng PDEA-BARMM, agad na inaresto ng kanilang mga agents sina Kusin, Pendular at Batuga matapos nilang mabilhan ng P102,000 na halaga ng shabu sa isang entrapment operation sa Doña Pilar Street sa Barangay Poblacion 2, Cotabato City.

Naikasa ang buy-bust sa tulong ng mga units na pinamumunuan ni Brig. Gen. Prexy Tanggawohn, director ng Police Regional Office-Bangsamoro Autonomous Region.

Ayon sa mga impormante, sina Kusin, Pendular at Batuga ay protektado umano ng Dawlah Islamiya at ng Bangsamoro Islamic Freedom Fighters sa kanilang pagbebenta ng shabu at marijuana sa mga liblib na lugar sa mga probinsya sa Central Mindanao.