POLANGUI, Albay, Philippines — Patay na nang matagpuan ang isang Grade 5 pupil na batang lalaki matapos mahulog at malunod sa kanal habang naglalaro sa gitna nang malakas na bagsak ng ulan noong Linggo sa Zone-3, Brgy. Lanigay, Polangui, Albay.
Sinubukan pa sanang isugod sa pagamutan nang matagpuan ang walang malay na bata na kinilala lamang sa pangalang “Mak”, 11-anyos, residente ng naturang lugar pero idineklarang dead-on-arrival.
Sa ulat, pasado alas-3 ng hapon naglalaro ang biktima sa kalsada habang malakas ang bagsak ng ulan nang aksidente itong nadulas at nahulog sa kanal. Tinangay ang bata nang malakas na agos ng tubig-baha sa kanal at hindi na nakitang nakaahon pa.
Nakita naman ng isa pang bata ang biktima dahilan para humingi ng saklolo at nagtulung-tulong ang mga residente pati rumespondeng mga pulis sa paghahanap sa nahulog na bata.
Umabot ng halos 30 minuto bago narekober ang walang malay na biktima at mabilis na isinugod sa Josefina Belmonte Duran Memorial Albay Provincial Hospital sa Ligao City pero idineklarang patay.