GUMACA, Quezon, Philippines — Patay agad ang isang rider habang nasa kritikal na kondisyon ang kanyang angkas makaraang bumangga ang kanilang sinasakyang motorsiklo sa kasalubong na passenger bus sa Maharlika Highway na sakop ng Barangay Rosario sa bayang ito, kamakalawa ng madaling araw.
Patuloy pang inaalam ng pulisya ang pagkakakilanlan ng nasawing rider gayundin ang backrider nito na nasa Gumaca District Hospital.
Patuloy namang sumasailalim sa imbestigasyon ang tsuper ng Daewoo Truck Bus na pag-aari ng Raymund Transit na kinilalang si Alyas Arlan, 50 ng Camarines Sur.
Ayon sa pulisya, bandang ala-1:58 ng madaling araw ay minamaneho ni Arlan ang nasabing bus patungo sa Bicol Region nang bumulaga sa kanilang harapan ang isang Honda beat motorcycle na kinalululanan ng mga biktima.
Pinilit na iniwasan ni Arlan ang motorsiklo subalit sumalpok pa rin sa unahan ng bus na naging sanhi ng natinding pinsala na inabot ng mga biktima na ikinamatay ng isa.