MANILA, Philippines — Inianunsiyo ng Philippine Charity Sweepstakes Office (PCSO) na isang taga-Laguna ang pinalad na magwagi ng P9 milyong jackpot prize sa Lotto 6/42 na binola kamakalawa ng gabi.
Sa abiso ng PCSO, ang lucky ticket na may winning numbers na 06-24-25-28-02-16 ay nabili ng lucky winner sa Lucky Circle Corp., Calamba, Laguna.
Kaugnay nito, pinaalalahanan naman ng PCSO ang lucky winner na maaari niyang makubra ang napanalunang premyo sa PCSO main office sa Mandaluyong City.
Kinakailangan lamang anila ng lucky winner na iprisinta ang kanyang lucky ticket at dalawang identification cards.
Nagpaalala rin ang PCSO na ang lahat ng lotto winnings na lampas ng P10,000 ay papatawan ng 20% tax sa ilalim ng Tax Reform for Acceleration and Inclusion (TRAIN) law.
Hinihikayat naman ni PCSO General Manager Melquiades Robles ang publiko na suportahan ang kanilang gaming products upang mas marami pa silang matulungang mamamayan.