CAVITE, Philippines — Isang pulis ang nabiktima ng isang kilabot na “motornapper” matapos tangayin ang kanyang Suzuki raider na naka-park mismo sa harapan ng kanyang bahay kamakalawa sa Brgy. Sampalok 2, Dasmariñas City.
Nakilala naman ang suspek sa pamamagitan ng CCTV camera na si alyas “Jomar”, 32-anyos, ng Naga Road, Evacom, Talon Dos, Las Piñas City, na tinutugis na ng pulisya.
Sa salaysay ng biktimang si Police Staff Sergeant Romulo Nestro, 37-anyos, nakatalaga sa Southern Police District (SPD)at residente ng Barangay Sampaloc 1, Dasmariñas City, Cavite, alas-3:20 ng madaling araw nang umuwi umano siya galing sa duty at iniwan ang kaniyang Suzuki Raider 150, 2015 model sa harap ng kanilang bahay.
Dakong alas-7 ng umaga nang gumising ang nasabing pulis at nang puntahan ang kanyang motorsiklo ay dito na nadiskubre na nawawala na. Agad nitong ni-review ang kanilang CCTV footage at dito niya nakita ang pagtangay ng suspek sa nasabing sasakyan.