Trader tinodas ng karibal sa negosyo

MANILA, Philippines — Patay ang isang negosyanteng lalaki makaraang barilin sa leeg ng karibal nito sa negosyo, kamakalawa ng gabi sa Brgy. Paradahan 1,Tanza, Cavite.

Idineklarang dead on arrival sa ospital ang biktima na kinilalang si Lusvimer Ramos, nasa hustong gulang, residente ng Belmont Hills, Pasong Kawayan 2, Gen. Trias City, Cavite.

Nakatakas naman ang suspek na nakilala sa alyas na Kenneth, nasa hustong gulang, residente ng Brgy. Paradahan 1, Tanza, Cavite.

Sa imbestigasyon ng pulisya, bago naganap ang krimen, alas-8:00 ng gabi ay sakay ang biktima ng kanyang motor at binabaybay ang kalsada patungo ng Pasong Kawayan 2, nang harangin ng suspek at walang kaabug-abog na barilin ng malapitan sa leeg.

Matapos nito ay mabilis na tumakas ang suspek bitbit ang baril na ginamit.Naitakbo pa sa MV Santiago Hospital ang biktima,subalit idineklara itong dead on arrival.

Ayon sa pulisya, may alitan ang dalawa sa kanilang hindi nabanggit na negosyo.