CAVITE, Philippines — Dalawang kabahayan sa dalawang lugar sa lalawigang ito ang biniktima ng mga “Akyat-Bahay Gang” at natangayan ng mga pera, alahas at mahahalagang gamit, kamakalawa sa lungsod ng Gen. Trias at bayan ng Naic.
Sa ulat ng pulisya, ang unang insidente ay naganap sa lungsod ng Gen. Trias dakong alas-7:30 ng gabi nang pasukin ng hindi kilalang grupo ang isang bahay sa loob ng isang subdivision.
Sinamantala ng mga suspek habang walang tao sa nasabing bahay dahil sa umuwi ng Cagayan ang mga may-ari nito.
Sa salaysay sa pulisya ng isang residente mula sa katabing bahay, alas-9 ng gabi nang makarinig umano siya ng ingay at kaluskos sa katabing unit na pag-aari ng mga biktima na nakabakasyon sa Cagayan.
Nabatid na natangay ng mga suspek ang mga alahas at iba pang gamit sa loob ng bahay.
Samantala, sa bayan ng Naic, alas-10:30 ng gabi nang pasukin at pagnakawan din ng mga ‘di nakilalang suspek ang bahay ng isang alyas “Marijoll” sa Purok Mansanas, Brgy Sabang ng nasabing bayan.
Nakulimbat ng mga suspek ang cash money na aabot sa mahigit P50,000, isang laptop ASUS na may halagang P55,000, isang Huawei laptop na may halagang P40,000, dalawang hard drive, ATM card at iba’t ibang klase ng mga IDs.