BATANGAS, Philippines — Sinampahan ng kasong grave threat and alarm and scandal sa City Prosecutor’s Office ang isang barangay chairman matapos na walang habas na nagpaputok at manutok pa ng baril sa isang konsehal sa Batangas City Linggo ng gabi.
Kinilala ni PLt. Sharen Ama, Public Information Officer ng Batangas City Police Station ang suspek na si Joven Camacho, chairman ng Barangay Malibayo, Batangas City.
Nag-ugat ang reklamo mula kay Lobo councilor Leslee Manalo Aguilar na siya umanong tinutukan ng baril ni Camacho.
Ayon sa report, naka- stand-by umano ang grupo nila Aguilar sa may kubo malapit sa basketball court ng barangay nang dumating ang lasing na si Camacho at armado ng baril bandang alas-9 ng gabi.
Nagbanta pa umano si Camacho na papatayin niya at uubusin ang lahat ng kanyang makakasalubong habang winawasiwas ang dalang baril.
Matapos magbanta, naglakad palayo si Camacho habang walang habas na nagpapaputok ng kanyang baril.
Wala namang napaulat na nasaktan sa nasabing insidente habang inaalam pa ng mga otoridad ang dahilan ng pagwawala ng kapitan na pinaghahanap pa rin matapos na tumakas at magtago.