CAVITE, Philippines — Patay ang isang babae makaraang salpukin ng isang delivery truck habang tumatawid sa kalsada sa San Miguel St., Brgy. Poblacion 3, bayan ng Indang, dito sa lalawigan, kamakalawa
Dead-on-arrival sa pagamutan ang biktima na si Jenny Damandaman, nasa hustong gulang at residente ng Poblacion 3, Indang, Cavite habang nasa kustodya na ng pulisya ang delivery truck driver na si alyas “Tomas”.
Sa imbestigasyon ng Indang Police, alas-10:35 ng umaga habang tumatawid ang biktima patungo sa public market nang bungguin ng Hino delivery truck na may plate number NAR 2723 at minamaneho ni alyas Tomas.
Sa lakas ng impact, tumilapon ang biktima at tumama ang ulo sa kalsada na sanhi ng tinamong matinding pinsala.
Sa pagresponde ng ambulansya ng MDRRMO, agad na dinala ang biktima sa General Emilio Aguinaldo Hospital sa Trece Martires City subalit idineklara na siyang patay ng sumuring doktor.