MANILA, Philippines — Patay ang isang pulis nang barilin ng isang lalaking menor-de-edad na kanyang sinita sa curfew kahapon ng madaling araw sa Brgy. Banilad, Manadue City.
Dead-on-the-spot ang biktimang si Police Staff Sergeant Orvin Seth Lim Felicio, ng Consolacion, Cebu at naka-assign sa Mandaue City Police Station 5.
Nangyari ang pamamaril dakong alas-12:10 ng madaling araw kahapon sa P. Remedios Street, Barangay Banilad, Mandaue City.
Nasa kustodiya na ng pulisya ang menor-de-edad na suspek matapos na sumuko sa kanyang guro.
Ayon kay Police Lieutenant Colonel Mercy Villaro, information officer ng Mandaue City Police Office (MCPO), sakay ng kanyang motorsiklo ang biktima upang sunduin ang kanyang misis nang mapansing tumatakas ang isa sa mga menor-de-edad na hinuhuli ng barangay dahil sa curfew.
Hinabol ng biktima ang binatilyo subalit bigla na lamang pinaputukan ng huli ang pulis sa ulo at braso at saka mabilis na tumakas.
Agad namang nagsagawa ng manhunt ang mga pulis subalit bigo na mahanap ang suspek.
Makalipas ang ilang oras, nakatanggap ng tawag ang pulisya mula sa isang guro na sumuko sa kanya ang suspek.
Ayon sa suspek, tumakas siya dahil sa takot na makulong sa police station dahil sa pagdadala ng baril.
Sinasabing miyembro umano ng “Crips Gang” ang minor na suspek.