MANILA, Philippines — Isang obrero ang nasawi nang saksakin sa dibdib ng isang lalaki na hinabol niya nang maaktuhang tinatangkang nakawin ang kanyang manok na panabong sa Antipolo City, Rizal kamakalawa.
Dead on arrival sa Cabading District Hospital ang biktimang si Darwin Vilayro, 20, ng Sitio Old Boso-boso, Brgy. San Jose, Antipolo City, dahil sa tama ng saksak sa dibdib habang nakatakas at tinutugis na ng mga otoridad ang hindi pa kilalang suspek.
Sa ulat ng Antipolo City Police,bago nangyari ang krimen,alas-3:00 ng madaling araw sa Sitio Old Boso Boso ay naaktuhan ng biktima ang suspek habang tinatangkang nakawin ang kanyang manok na panabong.
Mabilis umanong nagtatakbo ang suspek upang tumakas ngunit hinabol ito ng biktima at nang maabutan at mahuli ay bumunot ng patalim ang suspek at inundayan ng saksak ang biktima sa dibdib bago mabilis na tumakas.
Nakita naman ng tiyuhin ng biktima ang pangyayari at kaagad siyang isinugod sa pagamutan ngunit nasawi rin.