MANILA, Philippines — Isang 33-anyos na magsasaka ang nasawi nang ito ay pagbabarilin habang gumagamit ng Wi-Fi sa Sitio Talagbuan, Barangay Marcelo, Calatrava, Negros Occidental noong Linggo ng gabi.
Ang biktima na tinamaan ng bala sa dib-dib at tumagos sa likod na kanyang ikinasawi ay nakilalang si Rene Fernando ng Barangay Marcelo.
Sinabi ni Police Major Wilfredo Benoman Jr., hepe ng Calatrava police, kumokonekta sa Wi-Fi ang biktima sa isang tindahan nang lapitan at pagbabarilin ng hindi pa nakikilalang tao.
Sinabi ni Benoman na nagawa pang makatakbo ng biktima ilang metro ang layo mula sa pinangyarihan ngunit bumagsak ito sa lupa.
Dinala ang biktima sa ospital kung saan idineklara itong patay.
Sinabi ni Benoman na tinitingnan nila ang background ng biktima upang matulungan silang matukoy ang motibo sa insidente.