San Jacinto, Masbate, Philippines — Kalaboso ang pangalawang pinakamataas na kumander ng New People’s Army sa lalawigan ng Masbate matapos mahuli ito sa ginawang arrest warrant operation sa Poblacion ng bayan ng San Jacinto, dito sa lalawigan, kamakalawa ng tanghali.
Nasa kustodya na ng San Jacinto Municipal Police Station ang suspek na kinilala lamang sa alyas nitong “Ka Ador”, vice-commanding officer ng Larangan 4 Guerilla fighter ng NPA Sub-Regional Committee 4 na may malawak na operasyon sa naturang lalawigan.
Sa ulat ng Camp Gen. Simeon Ola, alas-12 ng tanghali nakatanggap ng impormasyon ang mga pulis sa kinaroroonan ng umano’y lider ng mga komunista dahilan para agad bumuo ng arresting team ang Masbate Provincial Police Office.
Bitbit ang warrant of arrests na inilabas ng korte laban kay “Ka Ador” dahil sa mga kaso ng murder at frustrated murder ay agad nilang sinalakay ang pinagtataguan nito. Hindi na nakapalag pa ang suspek na kusang sumama na lamang sa mga umarestong pulis.