Big-time pusher timbog sa P2.7- milyong shabu
NABUA, Camarines Sur, Philippines — Arestado ang isang big-time drug pusher na nasa drug watchlist ng pulisya matapos makuhanan ng P2.7 milyong halaga ng shabu sa buy-bust operation sa Zone-5, Brgy. San Esteban, Nabua, Camarines Sur kamakalawa.
Nahaharap sa kasong paglabag sa Comprehensive Dangerous Drugs Act of 2002 ang suspek na kinilalang si Allan Niar Prades, 33-anyos, residente ng Brgy. Sta. Cruz.
Sa ulat, alas-5:25 ng umaga katuwang ang Camarines Sur Provincial Drug Enforcement Unit, inilatag ng mga tauhan ng Nabua Police sa pangunguna ni chief of police Lt. Col. Jan King Calipay ang buy-bust operation laban kay Prades.
Agad inaresto si Prades ng mga operatiba makaraang iabot nito sa poseur buyer ang biniling droga na umaabot sa timbang na 50-gramo at may street value na P340,000. Nang rekisahin ang dalang sling bag ng suspek ay natagpuan ang pito pang plastic sachet ng shabu na tumitimbang sa 350 gramo at nagkakahalaga ng P2,380,000.
Nakumpiska sa suspek ang kabuuang P2.72 milyong halaga ng droga, boodle money na ginamit sa buy-bust at cellphone na gamit sa ilegal na transaksyon.
- Latest
