BULA, Camarines Sur, Philippines — Idineklarang dead on arrival sa ospital ang isang motorcycle rider at kanyang angkas matapos mabangga nang nag-overtake na bus sa kahabaan ng Maharlika National Highway ng Zone-5, Brgy. Pawili, Bula, Camarines Sur kamakalawa ng umaga.
Kinilala ang mga nasawi na sina Jo Pazuela, 27, rider, residente ng Brgy.Peñafrancia Avenue at angkas na si Marie Val, 35, ng Brgy.San Felipe, kapwa ng Naga City.
Sa ulat, alas-7:15 ng umaga ay mabilis na binabagtas ang kahabaan ng highway ng Grandbird Bus Lines (ABG-1798) na minamaneho ni Spensher Edroso, 28, residente ng Brgy. Sto.Domingo, Iriga City.
Gayunman, pagdating sa lugar ay sinubukan ng bus na mag-overtake sa sinusundang trak dahilan para maokupa nito ang linya ng kasalubong na motorsiklo (422-QVH) ng mga biktima at nasalpok.
Sa lakas ng pagkakabangga nawasak ang kanan at unahang bahagi ng bus at pumailalim pa ang motorsiklo habang tumalsik sa sementadong kalsada ang mga biktima.
Agad rumesponde ang mga tauhan ng MDRRMO-Bula at isinugod sa pagamutan ang duguan at walang mga malay na biktima pero pareho silang idineklarang patay.
Kasong reckless imprudence resulting in multiple homicide ang kinahaharap na kaso ng driver ng bus na nasa kostudya na ng mga pulis.