Kariton hila ng kalabaw, dumausdos
GUINOBATAN, Albay, Philippines — Basag ang ulo ng isang 16-anyos na binatilyo habang sugatan at patuloy na ginagamot sa hospital ang kaanak na 10-anyos matapos silang tumilapon nang biglang dumausdos ang sinasakyan nilang kariton na hila ng kalabaw sa Purok-4, Brgy. Maninila ng bayang ito kamakalawa ng hapon.
Patay agad matapos tumilapon at pumalo ang ulo sa puno ng niyog ang biktima na si Jaose Sela, grade-10 student habang sugatang isinugod sa Josefina Belmonte Duran Memorial District Hospital sa Ligao City si Marmi Sela, grade-3 student, pawang residente ng naturang lugar.
Sa ulat, dakong alas-5:50 ng hapon magkasama ang mga biktima sakay ng kariton na hila ng kalabaw na nangunguha ng niyog sa kanilang lupain nang aksidenteng dumausdos ang sinasakyan at tumilapon ang dalawa. Tumama ang ulo ni Jaose sa puno ng niyog at agad nasawi dahil sa matinding pagkakabagok. Sugatan naman sa kaliwang paa si Marmi at nagpapagaling na sa pagamutan.