Misis kinatay ni mister dahil sa SIM card!
BUHI, Camarines Sur, Philippines — Karumal-dumal na kamatayan ang sinapit ng isang misis sa kamay mismo ng sariling mister matapos siyang pagtatagain at pagsasaksakin makaraan ang kanilang pagtatalo dahil lang umano sa Sim card sa Zone-1, Brgy. San Jose Salay, Buhi, Camarines Sur kamakalawa ng madaling araw.
Patay agad dahil sa malalalim na taga at saksak sa labas ng kanilang bahay ang biktima na kinilalang si Mercy Grutas Palmiano, 30-anyos habang tinutugis na ng mga pulis ang tumakas na mister na kinilalang si Jolito Palmiano, nasa hustong gulang.
Sa ulat, dakong alas-12:58 ng madaling araw dahil umano sa “SIM card” sa cellphone at “posibleng selos” ay mainit na nagtalo ang mag-asawa.
Sa gitna ng pagtatalo ay kumuha ng gulok ang suspek saka walang habas na pinagtataga sa iba’t ibang bahagi ng katawan ang misis na duguang humandusay sa labas ng kanilang bahay at agarang nasawi.
Mabilis na tumakas ang suspek matapos na mapatay ang kabiyak.
Isa sa mga anggulong tinitingnan ng pulisya sa krimen ay posibleng matinding selos, kung saan pinagdududahan ng mister na may ibang ka-chat ang biktima gamit ang pinag-aawayang SIM card na ikinaburyong ng suspek.
- Latest
