COTABATO CITY , Philippines — Patay ang isang guro matapos na tambangan at tadtarin ng bala ng mga ‘di kilalang suspek sa Zamboanga del Sur nitong hapon ng Huwebes.
Sa ulat nitong Biyernes ng Zamboanga del Sur Provincial Police Office, sakay ng kanyang motorsiklo si Jerome Faunillan Etorma, guro ng Dumingag National High School sa Dumingag, Zamboanga del Sur nang tambangan ng mga armado sa isang bahagi ng highway sa Barangay Boniao, bayan ng Mahayag sa naturang probinsya.
Nagawi sa gilid ng highway at doon na nabuwal ang motorsiklo ni Etorma sanhi ng mga tama ng bala sa kanyang katawan.
Mabilis namang tumakas ang mga nag-ambush kay Etorma gamit ang motorsiklo.
Ayon sa mga kapwa niyang guro, wala silang alam na may kagalit si Etorma at umaasa silang magtutulungan ang mga kasapi ng Mahayag at Dumingag Municipal Police Stations sa pagkilala sa mga pumatay sa kanya at anong motibo sa krimen.