LEGAZPI CITY, Albay, Philippines — Pormal na inilunsad kahapon ng Police Regional Office (PRO)-5 regional director Brig. Gen. Andre Perez Dizon sa loob ng Camp Gen. Simeon Ola ang “Kasurog (Kakampi) Cops Bike Patrol” sa Kabikulan.
Pinangunahan ni PRO-5 regional director Brig. Gen. Andre Perez Dizon ang paglulunsad ng Kasurog Cops Bike Patrol kahapon sa kanilang headquarters.
Ayon kay Brig. Gen. Dizon, inisyal munang 20 police bike patrollers ang kanyang inorganisa at sa susunod na mga araw ay nakatakda rin itong ipatupad sa iba’t ibang lalawigan at mga police stations sa buong rehiyon. Magru-ruta umano ang naturang mga police bike patrollers sa mga pangunahing kalye sa bayan ng Daraga at lungsod ng Legazpi.
Binigyang diin nito ang kahalagahan ng police visibility gamit ang bisikleta bilang panlaban sa masasamang loob at mga kriminal sa mga kalye at iba’t ibang lugar.
Naging epektibo umano sa anti-criminality program ng naturang programa noong siya ang naging director ng Manila Police District (MPD) kung kaya’t naisipan niyang dalhin ito sa Bicol.
Maliban sa hindi na gagamit ng gasolina ay magandang ehersisyo pa aniya ito sa mga tauhan.
Malaki ang tiwala ng regional director na magiging matagumpay ang inilunsad nilang Kasurog Cops Bike Patrol sa Albay at umaasang maipapatupad din ito ng kanyang mga provincial directors at city director ng Naga City Police Office.