CAVITE, Philippines — Aabot sa ilang libong pisong halaga ng pinagbentahan ng isang pharmacy ang nilimas matapos itong pasukin ng hinihinalang “akyat bahay gang” kahapon sa Unit 9 Heritage Bldg. D. Mangubat Avenue, Barangay Burol Main, Dasmariñas City.
Sa nakalap na ulat mula sa pulisya, alas-8:30 ng umaga nang madiskubre ng isang staff ng Zure RX Pharmacy na pinasok ang kanilang botika.
Sa salaysay ng empleyado sa pulisya, pumasok siya sa trabaho sa pharmacy ng nasabing oras at gumulantang sa kanya na sira na ang padlock at nakaangat ang rollup door nito.
Pagpasok ng staff sa loob, dito niya nadiskubre na magulo ang mga gamit at wala na ang malaking halaga ng pera sa kanilang vault.
Kasalukuyan nang nagsasagawa ng followup operation at investigation ang pulisya at nangangalap na rin ng mga kopya ng CCTV para sa posibilidad na makilala ang mga suspek.