LUCENA CITY, Philippines — Dahil sa pag-iwas sa isang tumatawid na aso sa highway, sumemplang ang isang motorsiklo na nagresulta sa pagkamatay ng isang lolong angkas at pagkasugat ng rider kamakalawa ng gabi sa Barangay Isabang sa lungsod na ito.
Dahil sa walang suot na helmet, nabasag ang bungo at nalagutan ng hininga noon din ang biktimang ipinatago sa pangalang Lolo Elias, 60, residente ng Hermana Fausta Village sa nasabing barangay.
Ginagamot naman sa Lucena United Doctors Hospital (LUDH) ang rider na si alyas John, 29.
Ayon sa ulat ng Lucena Police, bandang alas-9:15 ng gabi, tinatahak ng mga biktima na sakay ng Yamaha Mio Soul ang nasabing kalye nang biglang tumawid ang isang aso.
Dahil sa pag-iwas ni John ay nawalan siya ng kontrol sa manibela at sumemplang ang sinasakyan nilang motorsiklo at bumagok ang ulo ng matanda sa sementadong kalye na kanyang agarang ikinamatay.