COTABATO CITY, Philippines — Tatlong katao kabilang ang isang bata ang nasawi nang sila ay masalpok ng kotse habang naglalakad sa gilid ng highway sa Brgy. Calapagan sa Lupon, Davao Oriental nitong Lunes.
Sa ulat nitong Miyerkules ng Davao Oriental Provincial Police Office at ng Police Regional Office-12, idineklarang dead on arrival ang mga biktimang sina Joselito Semiros, 58; Camille Toledo, 23; at 2-anyos na si Adessa Toledo.
Lumalabas sa imbestigasyon na naglalakad sa gilid ng highway ang mga biktima nang masalpok ng isang kotseng Toyota (VID 311) na minamaneho ni Vicente Mocoy Ambayec, 48 na umano’y iniwasan ang kasalubong na isang asong gala at dalawang motorsiklong mabilis ang takbo.
Nawalan ito ng control sa manibela kaya’t nagpagewang-gewang at napunta sa gilid ng highway at nasapol ang mga biktima.
Nasa kustodiya na ng Lupon police station si Ambayec na nakatakdang sampahan ng kaso.