Habang patungong family outing
MAUBAN, Quezon, Philippines — Labing-limang magkakapamilya na patungo sa family outing ang nasugatan nang mahulog sa creek ang kanilang sinasakyang nirentahang van kamakalawa ng umaga sa Barangay Concepcion sa bayang ito.
Ayon sa report ng Mauban Police, galing sa Malinao, Pasig City ang magkakamag-anak at mag-a-outing sana sa Cagbalete Island nang habang tinatahak nila ang Mauban-Sampaloc Road ay lumihis ang van sa kabilang lane at tumalon sa mababaw na creek sa gilid ng kalsada dakong alas-7:00 ng umaga.
Nagtamo lamang ng mga minor injuries ang mga sakay kabilang ang apat na menor-de-edad.
Dinala pa rin ang mga biktima sa pagamutan at hindi na rin natuloy sa kanilang outing.
Nakaidlip umano ang driver habang nagmamaneho sanhi ng aksidente, ayon sa inisyal na imbestigasyon ng pulisya.