LUCENA CITY, Philippines — Magkasama hanggang sa kulungan ang dalawang babaeng tulak ng ipinagbabawal na droga na kapwa kabilang sa talaan ng Provincial Police Office-Suspected List Individual (PPO-SLI) matapos silang malambat sa isinagawang buy-bust operation sa Purok Ilang-ilang, Brgy.Isabang, dito sa lungsod, kamakalawa ng gabi.
Kinilala ni PLt. Col. Ruben Ballera Jr., chief of police ng lungsod, ang mga naaresto na sina Reynalyn Fernandez y Banaag alyas Madam, 31, dalaga ng Brgy. Marketview at Gema Villanueva Y Garcia alyas Ate Gem, 32, ng Infanta, Quezon.
Ayon kay Ballera, isinagawa ng mga operatiba ng City Drug Enforcement Unit ( CDEU ) ang buy-bust operation laban sa mga suspek dakong alas-11:37 ng gabi kung saan ay nakumpiskahan sila ng anim na plastic sachet ng suspected shabu na tumitimbang ng 3 gramo na nagkakahalaga ng P61,200, at P500 marked money.
Paglabag sa RA 9165 o Comprehensive Dangerous Drugs Act of 2002 ang kinakaharap na kaso ng mga suspek.