CAVITE, Philippines — Patay ang isang 6-taong gulang na batang lalaki makaraang masagasaan ng Xpander sa loob ng Subdivision kung saan naglalakad ang biktima kamakalawa ng hapon sa Brgy. Sampaloc 4 Dasmariñas Cavite.
Hindi na umabot pa ng buhay sa pagamutan ang batang biktima na nakilalang si Ezikiel Prencillo Sabando, residente ng Cityhomes, Dasmariñas City, Cavite.
Nahaharap naman sa patung-patong na kaso ang driver na si Joven Jersey Francisco, 37-anyos, ng Brgy. Sampalok 4, Dasmariñas City, Cavite.
Sa imbestigasyon, alas-2:30 ng hapon habang naglalakad ang biktima sa may Makati Drive City Homes, Brgy. Sampaloc 4, nang mahagip ng Mitsubishi Xpander na minamaneho ni Francisco habang palabas ng nasabing subdivision.
Napag-alaman na hindi umano napansin ng driver ang bata kung kaya tuluy-tuloy niyang nasagasaan.
Naitakbo pa ang biktima sa St. Paul Hospital subalit hindi na umabot pang buhay.