Sa mismong birthday ng anak
BACACAY, Albay, Philippines — Karumal-dumal na kamatayan ang sinapit ng isang 39-anyos na babae matapos pagsasaksakin ng kanyang dating kinakasama sa harap mismo ng kanyang anak na nagdiriwang pa naman ng kaarawan sa Brgy. Panarayon, Bacacay, Albay kamakalawa ng gabi.
Agad nasawi dahil sa tinamong higit 20 saksak sa iba’t ibang bahagi ng katawan ang biktimang si Maila Cardano.
Sinubukan namang tumakas pero agad naaresto ng mga rumorondang barangay tanod ang suspek na si Jonathan Buela, nasa hustong gulang, kapwa residente ng naturang lugar.
Sa ulat, pasado alas-9 ng gabi, sinugod ng lasing at armado ng patalim na si Buela ang biktima sa bahay nito.
Bago pa nakatakbo ang biktima ay bigla siyang pinagsasaksak ng suspek sa harap ng kanyang anak na nagdiriwang ng ika-11 taong kaarawan.
Duguang humandusay ang ginang na naliligo sa sariling dugo at agad nasawi.
Sa inisyal na imbestigasyon ng mga pulis, matinding selos ang dahilan ng pananaksak ng suspek sa dating live-in partner.
Nakakulong na sa police station ang suspek at nakatakdang sampahan ng kasong murder.