37 baboy sakay ng bangka, nasabat sa Cebu
MANILA, Philippines — Nasa 37 baboy na hinihinalang nagtataglay ng African Swine Fever (ASF) ang bigong maipasok sa lalawigan ng Cebu mula Masbate nang maharang ang bangkang de-motor na kinalululanan nito noong Linggo.
Nasabat ng mga awtoridad ang mga baboy ng madaling-araw sa baybaying bahagi ng Barangay Bancasan, San Remigio na hindi naman karaniwang daungan ng mga bangkang de-motor ang naturang lugar.
Ayon kay Dr. Rose Vincoy, Cebu provincial veterinarian, pinaigting nila ang monitoring at pagbabantay laban sa pagpasok at paglabas ng baboy dahil sa kinakaharap na ASF outbreak.
Sa ngayon iniimbestigahan na ng mga awtoridad ang may-ari ng baboy kung saan walang kaukulang dokumento o permiso ang bangkero bilang patunay na legal ang pagpasok ng mga baboy sa probinsya.
Kaagad naman ginawa ang euthanasia o mercy killing sa mga baboy at inilibing sa naturang lugar para hindi na kumalat pa ang virus na posibleng magdulot ng sakit sa tao.
Kaugnay nito, nagpalabas na rin ng kautusan si Cebu Gov. Gwen Garcia, na bawal magpasok ng mga baboy mula sa Masbate at iba pang lugar sa probinsya. Aniya, pinoprotektahan lamang nila ang P11 bilyon pork industry sa Cebu na nananatiiling ASF free.
“I do not want to see a sudden drop in the prices of pork in San Remigio because of these smuggled live hogs,” ani Garcia.
Pinuri naman ni Garcia ng tanggapan ni Vincoy sa mabilis na aksyon.
- Latest
