Sa ilalim ng puno ng mangga
BAGUIO CITY, Philippines — Arestado ang 74-anyos na dating sundalo matapos maaktuhang ginagahasa umano nito ang isang 14-anyos na dalagita sa ilalim ng puno ng mangga sa gitna ng maisan sa Barangay Gucab, Echague, Isabela noong Linggo.
Dinampot ng mga operatiba ng Echague Police Station ang suspek na si Delfin Pascua na kabarangay ng biktima, matapos siyang isuplong ng isang barangay tanod na nakakitang hinihipo umano ng suspek ang mga pribadong parte ng katawan ng babaeng biktima.
Sinabi ng pulisya na nadatnang umiiyak ang biktima habang siya ay ginagahasa ng suspek sa ilalim ng nasabing puno sa gitna ng taniman ng mga mais sa naturang barangay.
Inihahanda na ng Echague Police ang kasong Rape by Sexual Assault in Relation to RA 11648 laban sa naturang dating sundalo habang ang biktima ay ipinasa na sa pangangalaga ng Municipal Social Welfare Development Office (MSWDO).