PASACAO, Camarines Sur, Philippines — Patay ang magsasaka matapos mangisay habang tinatanggal ang kable ng kuryente na sumabit sa katawan ng kanyang alagang kalabaw sa Sitio Camagong, Brgy.Balogo, Pasacao, Camarines Sur kamakalawa ng madaling araw.
Kinilala ang biktima na si Rannel Pitogo Lagasca, 25-anyos, binata at residente ng Zone-7, Brgy.Bical, San Fernando ng lalawigang ito.
Sa ulat, dakong alas-4:40 ng madaling araw, umalis ang biktima sa kanilang bahay at naglakad na hila-hila ang kanyang kalabaw para ipastol sa kalapit na barangay sa kanugnog na bayan.
Gayunman, dahil sa madilim pang paligid ay hindi nito napansin ang nakalambiting kable ng kuryente at sumabit sa katawan ng alagang kalabaw.
Sinubukan nitong tanggalin ang kable pero nang kanyang hawakan ay nanginig ang biktima dahilan ng agaran nitong kamatayan.