Mag-ama nasapol ng kidlat, utas!
MANILA, Philippines — Patay ang isang ama at anak nitong babae makaraang aksidenteng tamaan ng kidlat habang naghahapunan sa isang liblib na lugar sa bayan ng Catanauan, Quezon nitong Biyernes ng gabi.
Sa ulat ng CALABARZON Police, kinilala ang mga nasawing biktima na sina Jomar Funtillar at anak nitong si Jona.
Ayon sa pulisya, isang minuto bago mag-alas-6 ng gabi nang maitala ang insidente sa loob ng tahanan ng pamilya Funtillar sa Brgy. Tagbacan Ilaya ng bayang ito.
Base sa imbestigasyon, ang mag-ama ay kasalukuyang naghahapunan sa loob ng kanilang bahay nang biglang kumulog ng malakas at ilang saglit pa ay tumama ang matinding kidlat sa isang sulok ng nasabing tahanan kung saan nasapol ang mag-ama.
Ayon sa pulisya, ang bahay ng pamilya Funtillar ay gawa lamang sa mahihinang uri ng materyales .
Bunga ng pagtama ng kidlat, ang mag-ama ay nagtamo ng matitinding sugat sa iba’t ibang bahagi ng katawan na siya nilang ikinamatay..
Nanawagan naman ang mga opisyal ng barangay sa lugar para tulungan ang mag-ama na maipalibing dahil naghihikahos ang naturang pamilya.
- Latest
