1 patay sa lindol sa Benguet

MANILA, Philippines — Isang katao ang nasawi sa La Trinidad, Benguet sa pagtama ng malakas na lindol sa hilagang bahagi ng bansa na ang epicenter ay sa Abra.

Ito ang iniulat ni Lone District Benguet Rep. Eric Go Yap, ang malakas na lindol ay nakaapekto sa ­malaking bahagi ng Cordillera Region kabilang ang Benguet.

Sinabi ni Yap na sa Buguias, nasa 19 ­pasyente ang inilikas sa Northern Benguet District Hospital kung saan sa kasalukuyan ay sinusuri ang pinsala sa imprastraktura ng hospital gayundin ang mga kagamitan dito.

Ayon kay Yap bunga ng malakas na lindol ay maraming mga national at local roads sa lalawigan ang ­idineklarang ‘not passable’ o hindi muna pinadaraanan para matiyak ang kaligtasan ng mga motorista.

Anya, tinatayang tatagal ng dalawang linggo para sa clearing operations sa nasabing mga lugar kung saan magpapahirap ito sa mga komunidad.