65-anyos tigok sa sakal at sabunot ng magtiya

CAVITE, Philippines — Masaklap na kamatayan ang inabot ng isang 65-anyos na lolo matapos siyang pagtulungang sakalin at sabunutan ng magtiya kasunod ng kanilang mainitang pagtatalo sa Brgy. San Dionisio, Dasmariñas City, kamakalawa.
Dead-on-arrival sa pagamutan ang biktima na kinilalang si Domingo Samarita Sales, Jr., ng Block 1, Lot 14, ng nasabing barangay.
Arestado naman ang mga suspek na sina Arlene Marilao Bongato, 53-anyos at pamangkin nitong si Jim Bongato Bautista, 23; kapwa ng nasabi ring lugar.
Sa imbestigasyon ni P/Staff Sgt. Richard Domingo, may hawak ng kaso, alas-9:30 ng umaga nang maganap ang insidente sa Block 1, Lot 14, Brgy. San Dionisio habang nagtatalo ang biktima at mga suspek.
Nauwi umano sa sigawan at murahan hanggang sa mapikon ang magtiya kung kaya pinagtulungan na nila ang biktima. Pinagsusuntok sa ulo at sinakal ni Bautista ang matanda habang walang humpay namang sinasabunutan ni Arlene ang nasabing biktima.
Hindi tinigilan ng dalawa ang lolo hanggang sa lupaypay na bumagsak sa lupa. Nagawa pa siyang isugod sa ospital subalit patay na nang idating doon.
Agad namang naaresto ang magtiya na nahaharap sa kasong pagpatay.
Iniimbestigahan pa ng pulisya ang ugat ng pagtatalo ng biktima at mga suspek na nauwi sa bugbugan.
- Latest