Bading, pinatay ng 2 adik na ka-jamming!
![Bading, pinatay ng 2 adik na ka-jamming!](https://media.philstar.com/photos/2022/01/05/p2020-08-1620-05-322021-07-3123-29-37_2022-01-05_23-47-43.jpg)
CAVITE - Karumal-dumal ang sinapit ng isang miyembro ng LGBT community matapos na patayin at itapon ang bangkay nito sa gitna ng bukirin ng dalawang hinihinalang adik na ka-jamming umano nito sa droga kamakalawa ng hapon sa Brgy. Salinas 3, Bacoor City.
Kinilala ng Bacoor City Police ang biktima na si Danilo Garcia alyas “Danica”, nasa hustong gulang, isang gay o bading at walang permanenteng tirahan.
Naaresto naman sa isinagawang follow-up operation ng pulisya ang dalawang suspek na nakilalang sina Danilo Caparino at Geronimo Abrigo; kapwa nasa hustong gulang at residente ng Salinas 1, Bacoor City, makaraang makita ng ilang witness ang ginawang pagtatapon sa katawan ng biktima sa madamo at bakanteng lote sa nasabing lugar.
Sa nakalap na ulat mula sa tanggapan ni Cavite Provincial Police Office director P/Col. Arnold Abad, alas-3 ng hapon nang maganap ang krimen.
Magkakasama umano ang biktima at dalawang suspek sa isang kubo kung saan pansamantalang nakatira ang una sa may Virgo Bukid Dulo, Brgy. Salinas 3.
Nabatid sa saksi na isang barangay Ex-O na nakita umano niya na bitbit ng dalawang suspek ang lupaypay na biktima at dinala sa may madamong bahagi sa kalagitnaan ng bukid at doon iniwan.
Agad itong itinawag ng barangay sa pulisya at natagpuan ang katawan ng biktima na patay na at may dalawang tama ng bala sa katawan.
Sa ginawang pagsisiyasat sa nasabing kubo, nakarekober dito ang mga pulis ng ilang piraso ng transparent plastic sachet na may mga laman pang konting shabu, mga foil strip na pinaggamitan ng droga at ilang drug paraphernalia.
Narekober din ng pulisya ang isang fire cartridge case ng cal. 45 sa nasabing lugar.
Sa pagbeberipika pa ng pulisya sa barangay, napag-alaman na ang biktima ay maraming beses nang nasangkot sa mga petty crimes at malicious acts.
Madalas din umanong nakikita ang biktima na tila nakabatak o nasa ilalim ng impluwensya ng ilegal droga.
- Latest