12 BIFF combatants sumurender
MANILA, Philippines — Dumanas ng dagok ang grupo ng mga pinaghihinalaang teroristang Bangsamoro Islamic Freedom Fighters (BIFF) matapos na sumuko sa mga lider ng lokal na pamahalaan at ng tropa ng militar ang 12 nitong combatants sa Datu Salibo, Maguindanao kahapon ng umaga.
Sinabi ni Major Gen. Juvymax Uy, commander ng Joint Task Force (JTF) Central at 6th Infantry Division ng Philippine Army, dahil sa malawakang pagsuko ng BIFF sa gobyerno ay nababanaag na ang pagbagsak ng teroristang grupo.
Bandang alas-7:30 ng umaga nang sumuko ang 12 BIFF combatants sa mga opisyal ng lokal na pamahalaan at ng JTF Central sa Datu Salibo, Maguindanao.
Ang pagsuko ng 12 BIFF terrorists ay naisakatuparan sa tulong ng komunidad, lokal na pamahalaan ng Datu Salibo, tropa ng 1st Mechanized Battalion, 6th Infantry Battalion ng PA, police forces mula sa Maguindanao Provincial Police Office at Police Regional Office-Bangsamoro Autonomous Region in Muslim Mindanao (PRO-BARMM).
“The 12 former BIFF combatants belong to Bungos-Faction who likewise turned over 10 high-powered firearms,” pahayag ni Col. Pedro Balisi, commander ng 1st Mechanized Brigade ng Phil. Army.
Kabilang sa isinukong mga armas ay isang cal .50 machinegun, isang 5.56 M16 Ultimax rifle, apat na 7.62 MM M14 rifles, isang Mauser Sniper rifle at tatlong 7.62mm Sniper rifle.
- Latest
