Kawani ng Comelec, itinumba sa selebrasyon ng Islamic New Year

COTABATO CITY, Philippines - Nauwi sa trahedya ang masaya sanang pagdiriwang ng Amon Jadid o Islamic New Year matapos pagbabarilin hanggang sa mapatay ang isang empleyado ng Commission on Elections (Comelec)-Maguindanao ng ‘di pa nakilalang gunman sa Purok Balabaran, Brgy. RH-10 ng lungsod na ito, kahapon ng umaga.

Kinilala ang nasawing biktima na si Jonathan Pagadas Ganta, 43-anyos habang tinamaan naman ng ligaw na bala at sugatan ang payong-payong driver na si Guiamad Utto Akmad na nagkataong dumaan sa lugar.

Sa ulat na nakarating kay Police Captain Rustom Pastolero ng Cotabato Police Station 2, naganap ang pamamaril alas-8:00 ng umaga nitong Martes kung saan naglalaro lang ng chess si Ganta.

Ayon sa pulisya, posibleng may kinalaman sa trabaho ni Ganta ang pagkakapaslang sa kanya.

Narekober sa crime scene ang mga bala ng kalibre 5.56 millimeter mula sa M16 assault rifle na ginamit ng suspek sa pagpatay sa biktima.