MAGUINDANAO, Philippines – Dead-on-the-spot ang isang punong barangay matapos na pagbabarilin ng ‘di pa nakikilalang gunman habang nasa loob ng barangay hall sa Barangay Pandag, Pandag ng lalawigang ito, Sabado ng hapon.
Kinilala ang biktima na si Chairman Guimaludin Mamalinta, nasa hustong gulang at residente sa nasabing lugar.
Sa inisyal na pagsisiyasat ng Pandag Police, pasado alas-4:00 ng hapon habang nasa loob ng kanyang opisina si Mamalinta nang biglang pasukin ng di kilalang gunman at walang kaabug-abog na pinagbabaril.
Nagtamo ng maraming tama ng bala sa iba’t ibang parte ng kanyang katawan ang kapitan na naging sanhi ng agaran nitong kamatayan habang tumakas ang suspek sakay ng service vehicle nito sa hindi malamang direksyon.
Iniimbestigahan na ng pulisya kung may kinalaman sa pulitika o personal ang motibo sa brutal na pagpatay sa nasabing tserman.