Dayong ‘tulak’ todas sa buy-bust
NAGA CITY, Camarines Sur, Philippines — Bulagta ang isang dumayong tulak matapos na pumalag sa ginawang buy-bust operation ng mga pulis sa Zone-4A, Magtuto Compound, Brgy. Concepcion Pequeña ng lungsod na ito kamakalawa.
Napuruhan ng punglo sa iba’t ibang bahagi ng katawan at agad nasawi ang suspek na si Alvin Faurillo Pala, 40-anyos, may asawa ng Brgy. Quenalansan, San Jose.
Sa ulat, dakong alas-8 ng umaga, nakipagtransaksyon ang suspek sa poseur buyer na pulis kaya agad inilatag ang buy-bust operation ng Regional Drug Enforcement Unit 5 at Naga City Police Office-Station No.2. Gayunman, nang akmang dadakmain ng mga operatiba makaraang iabot nito sa poseur buyer ang biniling droga, bumunot ng baril ang suspek kaya pinutukan na siya ng mga pulis.
Nabawi mula sa napatay na suspek ang isang malaking sachet ng hinihinalang shabu na tumitimbang ng 150-gramo at nagkakahalaga ng P1.17-milyon, at isang kalibre 45 baril.
- Latest
